الخريف

بسمع كتير ..... همس الحفيف

لمّا الخريف ..... بيفوت بعكازه النحيف

وسط الشجر ..... زى الكفيف

بيدوس على أحلام ورق ..... متيتمه

ملهاش فروع ..... تسمع أهاتها المؤلمه

وتشوف دموع .....سرقت خضارها

يمكن قدرها ..... ان الخريف بيفوت ملوش قلب وعيون

زى الوبا ..... يسرح ف اوراق الشجر وقت الصبا

ويكوى الغصون

وتعدى لحظاته ف سكون ..... رغم ان صوت المعركه فاق الادان

وسيف خريف الدهر ..... مسلول من زمان

ف كل عام .. نفس المكان ..... ورق الشجر ف الانتظار

ومفيش أمان ..... أصل الشجر ملهوش بيبان

ولا ملكه حق الاختيار

يمضى الخريف ..... تلقى الربيع جاى من بعيد

والتوب جديد

بيلملم الورق اللى باقى .... واللى لسه رضيع

وبيدفن الورق اللى مات ..... واللى أنكتبله يكون شهيد

ياخد ف أحضانه الفروع ..... ويسد جوع

أوراق شجر ماتت جعانه ..... م الاهانه والخضوع

ويفوت قوام ..... ناوى الفراق

تتلملم الأوراق عليه ..... وبتساله والخوف كواها والاشتياق

أمتى الرجوع ؟؟
__________________


بأرجع مع الأيام لألام طويت عليها رمادى


أوراق ودبلت ويّا أقلام كتبت زمان الماضى


وأشوف أحلام عيونى ركام أطلالها ماليه الوادى